Máis da metade das consultas en Google resólvense sen saír do buscador

Partindo de datos de máis de 40 millóns de buscas baseadas en navegadores web en millóns de dispositivos móbiles e de escritorio en EE.UU. manexados por Jumpshot, dende SparkToro dan conta dun fito histórico para Google: máis da metade das buscas realizadas non desembocan nunha páxina web externa.
Non estamos a dicir que Google non atine nos seus resultados, senón que achega demasiada información, de xeito que os usuarios tendemos a atopar o que buscamos dentro da propia Google, sen ter que facer clic sobre os resultados para chegar á fonte orixinal, cumprindo así un dos grandes obxectivos do buscador, pero prexudicando seriamente a boa parte da web, que ve como Google vampiriza o seu contido.
No segundo trimestre de 2019 os resultados de busca sen clic serían o 49,76%, pero se concentramos o foco no mes de xuño temos que a porcentaxe chega ao 50,33%, ou sexa, que xa a maioría dos resultados manterían aos usuarios dentro de Google, o que podería chegar a verse como un abuso de posición dominante, especialmente se temos en conta que case a totalidade das buscas realizadas na web (o 94%) corresponden a Google, compañía que acapararía o 69,35% das buscas no seu buscador web xeral, o 20,45% no seu buscador de imaxes, o 2,98% en YouTube e o 0,75% en Google Maps.
Dende SparkToro tamén matizan que Jumpshot só está a medir as buscas vía web, non dende aplicacións móbiles, nas que a presenza de Google aínda é maior, de xeito que a cota de mercado real de Google nas buscas superaría o 97%.