A experta en mercadotecnia dixital Raquel Molinero, este mércores na UDC

Raquel Molinero, directora asociada de Studio Promotions na empresa de xogos en liña King, vai estar este mércores no Campus de Ferrol para impartir unha clase maxistral. A cita será ás 16.00 horas na Escola Politécnica Superior, ao abeiro do Mestrado en Deseño, Desenvolvemento e Comercialización de Videoxogos.
Especializada en metodoloxías para incrementar a comunidade usuarios dos servizos achegados por King, Molinero ten traballado como profesional da mercadotecnia dixital nos sectores do retail, o lecer e as viaxes da man de Groupon e Atrápalo.
A día de hoxe desenvolve o seu labor profesional con franquías como Farm Heroes Saga, Bubble Witch Saga ou Pet Rescue Saga nos estudos de King en España, Suecia e Reino Unido.
Grazas á súa clase maxistral, o alumnado do 1º e mais do 2º curso do mestrado achegarase á industria do videoxogo, máis polo miúdo ao eido dos teléfonos móbiles intelixentes, para afondar na importancia de investigar o mercado para a toma de decisións, as fortalezas e feblezas como organización, a visión, misión e os valores así como as estratexias de crecemento, visualización de marca e segmentación.
Máis seminarios da Facultade de Humanidades e Documentación
Pola súa banda, o alumnado do Grao en Xestión Industrial da Moda terá a oportunidade de escoitar ao profesor da Universidade da Granada, Pedro Francés Gómez, nun seminario centrado na ética profesional e na Responsabilidade Social Empresarial que terá lugar mañá, martes 29 de outubro, ás 15:30 horas, na Facultade de Humanidades e Documentación.
O mércores 30 de outubro, ás 12:00 horas, será a quenda do profesor da Universidade de Castela A Mancha, Emilio López Cano, quen afondará nas aplicacións prácticas da estatística na industria da moda. A este seminario asistirá tamén o alumnado do primeiro curso do Grao en Xestión Dixital de Información e Documentación.