Instagram prohibe o contido patrocinado de produtos de vapeo

Dende Facebook son conscientes de que hai moitos creadores de contidos que converteron as súas paixóns en formas de vida, polo que están a incorporar novos xeitos para que os creadores poidan colaborar con marcas en Instagram, aproveitando a ocasión para actualizar as normas sobre contido patrocinado.
Neste momento Facebook está a probar un novo xestor de contidos patrocinados para Instagram entre un grupo reducido de creadores e marcas, facilitando así que as marcas poidan consultar as estatísticas dos usuarios dun xeito fiable (non tendo que confiar nunha captura de pantalla), solucionando así o problema que supón a ocultación do número de gústames (que podería facerse definitiva a primeiros de 2020).
As novas ferramentas de xestión publicitaria terán un fondo impacto a longo prazo, pero de xeito inmediato o que temos son novas normas para o contido patrocinado, de xeito que incorporaron de xeito claro a prohibición de promocionar produtos e servizos relacionados co vapeo, o tabaco, o alcol e os suplementos dietéticos.
Cómpre detallar que o vapeo, o tabaco e as armas xa estaban vetados da publicidade, pero agora deixan claro que tampouco tolerarán este tipo de contidos entre os patrocinios, e tomarán medias activas contra este tipo de contidos nas vindeiras semanas.
No que se refire ao alcol e os suplementos dietéticos, a prohibición non será total, senón que ao longo do ano que vén contarán con ferramentas específicas que faciliten este tipo de contidos no caso de establecer restricións de idade.