As TIC ao servizo dos sectores tradicionais ourensáns centran os proxectos impulsados polas axudas INOU 2020

As axudas INOU 2020 da Universidade de Vigo e a Deputación de Ourense van impulsar catro proxectos innovadores nesta nova convocatoria: unha proposta para contribuír á reputación online do enoturismo ourensán, unha achega para interpretar a pintura rupestre esquemática da comarca de Monterrei, un proxecto para a análise e prevención de condutas aditivas e de risco nas redes sociais e máis unha contribución para o aproveitamento de restos de podas de vide.
Estas son as temáticas dos catro proxectos financiados a través da convocatoria de axudas a grupos de investigación do Campus de Ourense INOU 2020, financiada pola Universidade de Vigo e a Deputación de Ourense.
A convocatoria, dotada con 45.000 euros en total, pretende, tal e como recollen as súas bases, apoiar investigacións que contribúan ao desenvolvemento social e económico da provincia de Ourense e ao coñecemento da súa realidade, así como á especialización do Campus como Campus da Auga.
O proxecto coordinado máis amplo que financia esta convocatoria leva por título ORDEn: Oferta e Reputación Dixital do Enoturismo Ourensán e conta coa participación de persoal docente e investigador da Facultade de Ciencias Empresariais e Turismo e da Escola Superior de Enxeñaría Informática. O seu desenvolvemento artellarase en tres subproxectos, un centrado na diagnose do nivel de congruencia na oferta enoturística da provincia de Ourense, que desenvolverá María Lorena Rodríguez, coordinadora do proxecto; outro adicado á extracción e pre-procesamento de opinións sobre o sector enoturístico nesta provincia, que levará a cabo María Reyes Pavón, e un último de análise e modelaxe de opinións sobre o sector enoturístico ourensán, a cargo de Manuel Alfredo Mosquera.
Outra das iniciativas que financiará esta convocatoria é o Proxecto PRE-Media: Interpretación Patrimonial de Sitios con Pintura Rupestre Esquemática da Comarca de Monterrei. Nel, a investigadora do Grupo de Estudos de Arqueoloxía, Antigüidade e Territorio Beatriz Comendador traballará na creación dunha contorna virtual para a interpretación patrimonial de sitios con pintura rupestre esquemática desta comarca e a antropóloga Fátima Braña realizará o estudo etnográfico do sitio con arte rupestre de Penedo Gordo e análise de satisfacción da difusión.
O aproveitamento e valorización de residuos procedentes do agro na provincia de Ourense, concretamente o emprego de restos de podas de vide para a obtención de produtos de valor engadido, é o obxecto de estudo doutro dos proxectos financiados. Nel a investigadora Sandra Rivas traballará arredor do aproveitamento e valorización de restos de podas de vide para a obtención de “compostos de base”, útiles para a síntese de produtos químicos de interese industrial e biocombustibles, e Beatriz Gullón adicarase á recuperación de compostos bioactivos procedentes de podas de vide mediante o uso de disolventes intelixentes.
Un cuarto proxecto leva por título DIXITOU: Análise e Prevención de Condutas Aditivas e de Risco nas Redes Sociais. Intervención para o Uso Seguro de cara ao Benestar Dixital e nel conflúe persoal docente e investigador dos centros de Ciencias da Educación e Traballo Social e Enxeñaría Informática. Rubén González afondará na análise de condutas de risco nestas contornas e a influencia sobre a saúde do alumnado ourensán e María Encarnación González desenvolverá unha aplicación dixital para concienciar ao alumnado ourensán do uso das redes sociais.