Acast fai doada a integración de podcasts con Patreon

Nos últimos anos o podcasting foi gañando popularidade, aínda que o formato continúa a ter problemas para monetizar o contido, e para axudar a solucionar esta situación xorden plataformas como Acast, que facilita a creación de versións Premium dos podcast, o que vén de dar un importante salto ao integrarse coa plataforma de mecenado Patreon.
Deste xeito, un podcast publicado a través de Acast (plataforma que facilita as escoitas vía web e a través das aplicacións de podcasting máis populares) pode mesturar episodios públicos con privados, podendo acceder a estes últimos só os usuarios que contribúan economicamente co proxecto a través de Patreon.
Será interesante ver se a colaboración entre Acast e Patreon contribúe á monetización dos podcasts, facilitando así a consolidación deste formato de contidos que precisa de incentivos para manter a súa regularidade.