Clubhouse por fin pode descargarse oficialmente para Android

A semana pasada demos conta da chegada de Clubhouse a Android, aínda que este lanzamento limitábase oficialmente aos EE.UU., e nas últimas horas a aplicación abriu globalmente o seu acceso anticipado, de xeito que podemos ir directamente á tenda de Google Play para descargar a aplicación no noso smartphone.
Cómpre lembrar que esta aplicación de audio social segue pechada a usuarios que conten coa invitación pertinente, de xeito que, se aínda non recibimos un convite o único que poderemos facer é reservar o noso nome de usuario e agardar. A aplicación tamén pode comprobar se algún dos nosos contactos ten conta en Clubhouse, para que poidamos solicitarlle unha invitación para poder empregar esta ferramenta que ten serios problemas por demorarse tanto en chegar a Android, xa que a demora foi aproveitada por Twitter, Discord, Telegram e outras plataformas para ofrecer alternativas, que no caso de Twitter Spaces parten coa grande vantaxe de que os usuarios xa teñen redes construídas, polo que teñen máis doado atraer público ás salas de audio en directo.