A USC entrega os premios do 2º certame Vémolo Nós

Este martes 22 de outubro entregáronse os galardóns da 2ª edición do certame de vídeos Vémolo Nós. Foi nun acto celebrado no Pazo de San Xerome (USC), no que interviñeron o vicerreitor de Transformación Dixital e Innovación, Gumersindo Feijóo; o secretario xeral da Lingua, Valentín García, e, no nome das persoas premiadas, Rocío Manteiga Souto. Acompañounos o director do Servizo de Normalización Lingüística da USC, Manuel Núñez Singala. O obxectivo do concurso, dirixido á comunidade universitaria, foi “promover a produción e a difusión de contidos curtos e orixinais que fomenten o galego como lingua de divulgación científica”.
A interacción co medio rural, a vida na Universidade de Santiago e a lingua galega son os tres grandes temas que se abordan nos seis vídeos galardoados na segunda edición do certame Vémolo Nós, convocado pola Vicerreitoría de Transformación Dixital e Innovación a través do Servizo de Normalización Lingüística da USC.
Na categoría A, sobre divulgación do coñecemento, o primeiro premio nesta segunda edición foi para un vídeo realizado por Rocío Manteiga Souto, Falando de vacas, no que amosa como viven estes animais no rural galego e a grande importancia de darlles nomes, como factor que inflúe no seu benestar. O vídeo finalista nesta categoría é de Daniel Abella López e Adrián López Teijeiro, que elaboraron a peza A biotecnoloxía no rural galego, na cal expoñen unha serie de avances que se aplican na actualidade nese eido.
Obtivo o primeiro premio na categoría B, que ten como lema Descubrindo a USC, o vídeo Homenaxe a Carolina, de Iria Losada Rodríguez, dedicado á gata da Biblioteca Concepción Arenal do Campus Sur compostelán. Foi finalista o vídeo Dende o SEPIU, de Cecilia Álvarez Corujo, David Marante Manteiga, Paula Martínez Collazo e Sara Rodríguez Ourille, unha peza na que presentan os membros do Servizo de Participación e Inclusión Universitaria (SEPIU) cunha estética inspirada nas películas de axentes secretos de mediados do século XX.
E na categoría C, co lema Protagonista: o galego, recibiu o primeiro premio Iker Fernández Villar polo seu audiovisual Aaron Bennett Kleinschmidt, un estadounidense aprendendo galego, no que se mostra como este mozo e profesor se achega á cultura galega a través da lingua. Foi finalista o vídeo Falar galego é de balde de Irimia Pérez Sánchez e Manuel García Amado, no que recollen unha serie de ditos galegos apropiados para distintos situacións, como os populares Marcho que teño que marchar ou Chegar e encher.
Tanto o audio coma os textos que inclúen os audiovisuais están en lingua galega e cada unha das tres pezas galardoadas reciben como premio 1.500 euros, mentres que as finalistas obteñen 300 euros.