A Comisión Nacional dos Mercados e da Competencia (CNMC) iniciou un novo expediente sancionador contra Apple e Amazon por incumpriren a orde de cesamento das prácticas anticompetitivas que lles impuxo na resolución de xullo de 2023.
Naquela resolución, o organismo impuxo multas por un importe conxunto de 194 millóns de euros ás dúas empresas por incluír cláusulas anticompetitivas nos contratos que regulaban as condicións de distribución dos produtos de Apple en Amazon. Estas condicións restrinxían inxustificadamente o número de revendedores de dispositivos da marca na plataforma española, limitaban os espazos publicitarios dispoñibles para produtos competidores e impedían que Amazon dirixise campañas de márketing aos compradores de dispositivos Apple para ofrecerlles alternativas doutras marcas.
A resolución tamén obrigaba a ambas as empresas a adoptar as medidas necesarias para poñer fin a estas prácticas. Porén, as cláusulas que limitaban o número de revendedores e os espazos publicitarios destinados á competencia non foron eliminadas ata maio de 2025.
O 1 de outubro de 2025, o Consello da CNMC declarou que Apple e Amazon incumpriran a resolución de 2023 ao manter as condutas sancionadas ata esa data. A decisión chegou despois de que a Dirección de Competencia presentase unha proposta na que advertía do incumprimento e instaba a iniciar un novo procedemento sancionador.
A apertura deste expediente produciuse tras a denegación xudicial das solicitudes de suspensión cautelar presentadas polas dúas empresas. A CNMC dispón agora dun prazo máximo de tres meses para instruír o procedemento e ditar unha resolución.
A incoación non anticipa o resultado da investigación. Tanto a sanción imposta en 2023 como a resolución que declarou o incumprimento en 2025 foron recorridas ante a Audiencia Nacional e están pendentes de sentenza.
