As televisións locais do contorno de Compostela pretenden dixitalizar o seu sinal antes do verán

As concesionarias de canles de televisión dixital terrestre de ámbito local da demarcación de Santiago (Ames, Teo, Vedra, Padrón, Brión, Negreira, Rois e Santiago) mantiveron unha xuntanza con Manuel José Fernández Iglesias na que o director xeral de Comunicación Audiovisual lles presentou o servizo de contidos Cine Galego na Rede á vez que trataron sobre a TDT local, para o que tamén contaron coa presenza de Jesús García Porto, xerente de Retegal, que ilustrou sobre o estado do desenvolvemento dos distintos proxectos de TDT e aclarou aspectos técnicos e administrativos vencellados ó proceso de despregamento dixital.
Os responsables das televisións locais expresaron a súa vontade de comezar a emitir en dixital antes do verán, de xeito que aproveitarían a crecente cobertura da TDT, que xa chega ó 28% dos fogares galegos, aínda que só ten un 6% de cota de pantalla.