A impresión baixo demanda chegará ás revistas

A impresión baixo demanda de libros é unha tecnoloxía que actualmente están a utilizar con certo éxito dende Lulu e Bubok, permitindo a autopublicación, as tiraxes pequenas ou a posibilidade de adquirir exemplares descatalogados, e esta mesma filosofía quere trasladarse agora ás revistas a través de MagCloud, un servizo en probas que se está a desenvolver en colaboración cos Laboratorios HP (que achega a tecnoloxía HP Indigo) e que polo momento está limitado aos EE.UU.
Este servizo tería un funcionamento idéntico ao das plataformas de libros baixo demanda, só que neste caso os PDF coas revistas deben contar con imaxes de alta resolución (para unha reprodución axeitada) e o resultado se imprime coa calidade dunha revista das que podemos atopar nos quioscos.
MagCloud é de balde para os editores das publicacións, quedando o servizo cunha parte dos beneficios da súa venda, e xestionando tanto a posibilidade da venda como as subscricións. O prezo das revistas é duns 20 centavos de dólar por páxina aos que habería que engadir os portes (1,4 dólares por exemplar ou 13 dólares por entre 10 e 100 exemplares).
Cando o servizo comece a estar oficialmente operativo poderiamos aseguran que quen sexa capaz de imprimir en PDF será capaz de ter a súa propia revista.