Silicon Graphics adquirida a prezo de saldo para poder afrontar a súa bancarrota

A histórica Silicon Graphics, Inc. (SGI), moi popular entre os profesionais dos efectos visuais, non está a pasar bos momentos económicos, o que facilitou a súa adquisición por parte de Rackable Systems, que pagou uns 25 millóns de dólares en efectivo, formando un conglomerado dedicado á computación en cluster, contornos de almacenamento de datos, computación na nube (cloud computing), a Internet e plataformas de visualización, que pretenden aproveitar a forza en conxunto de ambas compañías para responder ás actuais demandas do mercado.
Onte SGI solicitou acollerse ao Capítulo 11 da Lei de Bancarrota nos EE.UU., agardando que se acepte dentro desta figura legal (dentro duns 60 días) para poder concretarse a súa fusión con Rackable, o que supón o ocaso dunha compañía que era sinónimo de liderado tecnolóxico durante a pasada década, e que na actualidade acumula unhas perdas de 526,5 millóns de dólares.