Zapatero prometeu ordenadores portátiles para os estudantes de 5º de primaria

Durante o Debate do Estado da Nación, o presidente José Luis Rodríguez Zapatero confirmou a información de que o Goberno estaba a preparar un plan para achegar ordenadores portátiles de baixo custo aos estudantes de primaria, precisando que esta iniciativa comezaría a aplicarse en setembro, polo que para o curso 2009/2010 os máis de 420.000 alumnos de 5º de primaria de colexios públicos e concertados poderían contar cun portátil que non só utilizarían nas aulas, senón que tamén o levarían para a casa para rematar as tarefas. O proxecto iríase espallando ao resto de cursos ata chegar ao último curso de secundaria, aínda que para este plan será precisa a colaboración das comunidades autónomas, que terían que co-financiar os equipos.
Dende Radiocable detallan que serán as comunidades autónomas as que decidan se os equipos informáticos funcionarán con Windows ou, pola contra, optarán polo Linux coma sistema operativo.
Pero esta iniciativa ten tantas luces coma sombras, pois o proxecto Escuela 2.0 aínda non ten un orzamento estimado, deberá complementarse con formación para docentes e alumnos, conta cunha marxe de tempo moi reducida para a súa implantación, aínda non parece que existan contidos electrónicos adaptados (aínda que iniciaron conversas cos editores de libros de texto), non definiron o tipo de equipos cos que levaran o proxecto a cabo (aínda que parece que o Classmate PC sería o modelo elixido) e mesmo hai dúbidas sobre a necesidade da medida, pois non parece que a informática vaia servir como panacea do sistema educativo español.
Todo apunta a que o Goberno inspirouse no proxecto luso e.escolinha, polo que os equipos cos que contarían os estudantes españois serían moi semellantes aos Magalhães que distribúen en Portugal a prezos de entre 0 e 50 euros segundo a capacidade económica da familia do alumno, aínda que Zapatero non concretou se habería que facer algún tipo de pagamento polo equipos que se distribúan en España.