Temen que as descargas de Internet cheguen a afectar ás vendas de libros

Os efectos das descargas de Internet na venda de produtos audiovisuais son bastante dispares, e o debate sobre se as súas consecuencias son positivas ou negativas ten xa moita historia, e agora promete trasladarse aos libros, pois o anuncio de que o Kindle DX permitirá a lectura de documentos en formato PDF podería espallar de xeito alarmante a piratería de libros a través da Internet.
De feito, hai moitos anos que circulan libros pola Rede en formato electrónico, pero o seu intercambio non é frecuente porque os usuarios tenden a considerar desagradable a lectura prolongada diante da pantalla do PC, pero os lectores de libros electrónicos poden supor un cambio de escenario realmente drástico, polo que moitos xa temen que o P2P comece a afectar á venda de libros.
Na actualidade a aparición de novidades editoriais nas redes P2P incluso podía supor un pulo á venda de libros, xa que melloraba a súa visibilidade e sona, pero agora deberán tomar medidas para manter un modelo de negocio sostible, para non repetir os erros da industria discográfica.