MySpace despedirá a 300 traballadores fóra de EE.UU.

A crise está a petar duro en MySpace, e a compañía, tras un importante recorte do seu cadro de persoal nos EE.UU. nun 30%, comeza agora a apertar o cinto no resto do mundo, e anuncia que pasará de 450 a 150 empregados no estranxeiro, o que afectará principalmente ás delegacións de Arxentina, Brasil, Canadá, Francia, Italia, México, Rusia, Suecia e España, ou sexa, nas zonas nas que o servizo está a perder posicións fronte a Facebook dun xeito máis que significativo.
Dende a compañía aseguran que pecharán como mínimo 4 das súas oficinas fóra dos EE.UU., polo que a presenza da compañía en España podería verse seriamente comprometida, aínda que hai que admitir que apenas logrou penetrar no mercado español, e as súas campañas locais deixaron unha mala impresión, coma o nefasto sistema de votación para o concurso de Eurovisión de 2008.
De todos os xeitos, non parece que os recortes vaian salvar a MySpace da crise, pois coma plataforma para redes sociais perdeu todo o seu pulo inicial e agora parece verse limitado a un sistema de promoción de grupos musicais, algo moi afastado dos seus comezos, pero que permite definir un nicho no que manter o negocio a longo prazo (aínda que a un nivel menos ambicioso).