Un rapaz de 13 anos comparte a súa experiencia de uso dun Walkman durante unha semana

Nun momento no que o Walkman fai 30 anos do seu lanzamento no Xapón, un rapaz escocés de 13 anos decidiu experimentar a tecnoloxía do pasado e durante unha semana deixou aparcado o iPod para utilizar o Walkman. Cómpre destacar que Scott Campbell, o mozo detrás desta iniciativa, é un dos editores da web tecnolóxica Net New Daily e incluso escribiu distintas colaboracións para o popular blog Crunchgear.

¿Cal é o interese desta análise? Pois simplemente é unha curiosidade. ¿Cómo ve un nativo dixital a tecnoloxía que para moitos estaba normalizada na nosa mocidade? O certo é que as impresións de Campbell son bastante obvias, e tras queixarse do enorme tamaño do que se supón que era un reprodutor de cintas portátil, considerar que a súa estética era pouco atractiva e ter que aturar burlas pola rúa ao utilizar semellante trebello do pasado, púxose a analizar os seus defectos e virtudes, quedando no último caso o feito de que o Walkman que probou incluía dúas tomas para auriculares (non precisando dun adaptador para escoitar a mesma música con outra persoa coma os reprodutores de MP3 actuais). Así pois, a calidade de son, os rudimentarios botóns, a reducida autonomía e a brusquidade coa que se sacaban as casetes foron vistas como grandes defectos do dispositivo de Sony.
Unha das cousas que experimentou o rapaz foi o uso da tecla de rebobinado como un elemento para ir a unha canción aleatoria, aínda que logo escoitou que tal práctica podería non ser moi recomendable, xa que os Walkmans tendían a tragar as cintas; pero a moitos resultaralles máis rechamante o feito de que Campbell tardase 3 días en decatarse de que as cintas tiñan dúas caras distintas (á vez que pensou que o conmutador normal/metal era para elixir un tipo de ecualización, cando era para indicar o tipo de casete utilizada).
En definitiva, que os Walkman son unha tecnoloxía do pasado, que pese a que non o pareza, é bastante diferente á dos reprodutores dixitais actuais, pese a coincidir en metáforas (como as iconas dos botóns), polo que a xente que non os utilizou no seu momento os verá como algo totalmente obsoleto, aínda que a xente de certa idade os mire de xeito nostálxico.