Apple podería presentar o seu Tablet como dispositivo de lectura de xornais e revistas

Nos últimos meses non foron poucos os rumores de que Apple estaba a preparar un ordenador portátil con formato Tablet aproveitando o éxito do iPhone e a súa interface de uso, o que foi sumándose a outras conxecturas, coma que poderían comercializar un equipo ultraportátil ou un lector de libros electrónicos, pero agora parece que todas estas informacións poderían confluír nun único dispositivo.
Nos últimos días Apple podería estar a contactar con distintas publicacións impresas para comercializar os seus contidos a través de iTunes e cun novo dispositivo hardware que sería tan válido para libros, coma para revistas e material multimedia, evitando as limitacións dos lectores de libros electrónicos, que na actualidade só presentan gráficos en branco e negro e cunha velocidade de refresco moi reducida).
Se atendemos aos últimos rumores, o dispositivo en cuestión sería un Tablet cunha pantalla de 10,7 polgadas capaz de amosar vídeo a 720p, operando co sistema operativo do iPhone, con conectividade 3G e, definitivamente, cunhas funcionalidades que serían distintas ás dun ultraportátil de baixo custo, de feito que estaría pensado principalmente como alternativa aos medios impresos.