O secretario xeral de Medios explicará no Parlamento o proceso de acendido dixital

Alfonso Cabaleiro Durán, secretario xeral de Medios da Xunta de Galicia, vén de solicitar unha comparecencia urxente na Comisión 1ª Institucional, da Administración Xeral, Xustiza e Interior do Parlamento galego para informar sobre o proceso de apagado analóxico e acendido dixital que se iniciará o vindeiro luns, 18 de xaneiro e que estará rematado o próximo 3 de abril.
Cabaleiro, segundo veñen de informar dende o executivo, “solicita esta comparecencia a petición propia“unha vez que a Xunta de Galicia e o Goberno central teñen ultimado as datas do apagamento analóxico.
O secretario xeral xa compareceu, tamén a petición propia, no Parlamento galego para informar de todo este proceso de dixitalización o pasado mes de xuño. Durante estes meses producíronse distintos contactos e xuntanzas con alcaldes e representantes dos distintos grupos políticos para informalos deste proceso de transición á TDT.
Asemade, o vindeiro venres, día 15, pola mañá, o secretario xeral de Medios ofrecerá unha rolda de prensa para explicarlle aos medios de comunicación todos os aspectos deste proceso de apagado analóxico.