Proseguen en Santiago, Ferrol, Pontevedra e Ourense as actividades de promoción do galego pola vía das redes

A nova edición do Seminiario de Dinamización Lingüística no Ensino, da que falamos hai pouco nesta mesma web, segue adiante logo da súa estadía en Coruña, Vigo e Lugo, ao longo do pasado mes de abril. A nova andaina da actividade informativa (e formativa), orientada a salientar as vantaxes das novas tecnoloxías como método de impulso do galego no eido educativo, retómase estes días nas cidades de Santiago, Ferrol, Pontevedra e Ourense. Como dixemos, a edición deste ano, a quinta, céntrase especialmente en informar aos profesionais da educación de calquera índole dos moitos recursos que as ferramentas informáticas, e máis nomeadamente as participativas (2.0), ofrecen para o afianzamento do galego nas escolas, arestora (sobre todo as das cidades) ben necesitadas disto.
Xa nun eido máis concreto, entre as actividades que se están a desenvolver atopase a da promoción 2.0 da nosa fala en colexios de Santiago e Pontevedra, a da presentación de dous proxectos de fomento da lingua en Ourense (a iniciativa Galegos e galegas de aquí e de acolá do CEIP A Pedra de Bueu e o proxecto Derrubando os muros das aulas, a radio escolar, do IES Pedras Rubias de Salceda de Caselas). Na cidade de Ferrol, Glòria Sanz i Pinyol inaugurou o V Seminario de Dinamización Lingüística no Ensino coa intervención Ensinar a ler e escribir na era dixital. O seminario, que comezou o pasado 20 de abril nas cidades da Coruña, de Vigo e de Lugo, prolongarase en Ourense, Pontevedra e Ferrol os días 5, 6, 11, 12 e 13 de maio. Na capital galega continuará nos días 5, 6, 11, 12 e 18 deste mes.