Publican a convocatoria de axudas do Plan Avanza 2010 por un importe total de 225 millóns de euros

Coa publicación no Boletín Oficial do Estado (BOE) da correspondente resolución da Secretaría de Estado de Telecomunicacións e para a Sociedade da Información do Ministerio de Industria, Turismo e Comercio, ábrese a convocatoria 2010 para a concesión de axudas do Plan Avanza para a realización de proxectos e accións da Acción Estratéxica de Telecomunicacións e Sociedade da Información dentro do Plan Nacional de Investigación Científica, Desenvolvemento e Innovación Tecnolóxica 2008-2011.
A convocatoria oriéntase a conseguir o adecuado desenvolvemento e utilización das tecnoloxías, aplicacións, servizos e contidos para a sociedade da información para contribuír ao éxito dun modelo de crecemento económico sustentable baseado no incremento da competitividade e a produtividade, a promoción da igualdade social e rexional, a accesibilidade universal e a mellora do benestar e a calidade de vida dos cidadáns.
A convocatoria forma parte dun conxunto de instrumentos que teñen como misión o desenvolvemento do tres primeiros eixes do Plan Avanza2 (Capacitación, Contidos e Servizos Dixitais e Desenvolvemento do sector TIC) e persegue os seguintes obxectivos fundamentais: – Situar a España na vangarda do coñecemento. – Promover un tecido empresarial altamente competitivo. – Promover a incorporación das tecnoloxías da información nas empresas, fundamentalmente nas pequenas e medianas. – Incorporar á cidadanía á sociedade da información, especialmente aos colectivos máis vulnerables. – Promover servizos públicos dixitais e de calidade. – Desenvolver as infraestruturas e servizos da Sociedade da Información. – O desenvolvemento dos contidos dixitais. – Asegurar a confianza nas aplicacións, servizos e contidos.
No aspecto procedimental, destaca que nesta convocatoria se intensifican as medidas orientadas á simplificación documental, á eliminación da esixencia de garantías para o pago anticipado de subvencións e préstamos, así como ao avance na utilización de medios telemáticos en todas as fases do procedemento, desde a presentación ata a xustificación da realización dos proxectos ou acción.
Ademais, co fin de facilitar o acceso ao financiamento prevese en todos os subprogramas que o pago das axudas, se efectúe sempre con carácter anticipado e polo importe total da axuda, con independencia do carácter anual ou plurianual da execución do proxecto.