Estudantes galegos traballan nun proxecto pioneiro para axudar a dependentes no fogar

Hai moito tempo xa que a televisión deixou de ser un obxecto de culto para converterse no que todo o mundo coincide en definir como “unha caixa tonta” que non ten máis utilidade que entreter á xente con absurdos programas de cotilleo nos que se poñen a parir a aquelas persoas que nalgún momento das súas vidas decidiron que non lles importaba facer pública a súa vida sentimental.
O caso é que grazas a un proxecto pioneiro que están a desenvolver alumnos da ETSE de Vigo, a televisión vai camiño de converterse nun aparello esencial para o día a día das persoas dependentes do noso país, que atoparán nela a axuda ideal para solventar os problemas que vaian xurdindo no seu quefacer diario.

Tarefas como tomar as mediciñas á súa hora, acudir ás súas citas médicas, realizar exercicios de rehabilitación axeitados ás súas doenzas, etc., van deixar de ser unha preocupación para as persoas dependentes, que obterán nesta interface as solucións axeitadas á medida de cada usuario ou usuaria.
A idea deste proxecto é que os televisores que leven incorporada a plataforma que están a deseñar na ETSE de Telecomunicación de Vigo, melloren as vidas no fogar das persoas dependentes, dunha maneira doada; como? pois a través dunha iniciativa que eles mesmos definen como “sinxela e accesible” que pode estar lista para finais deste ano.
Ata entón investigadores e usuarios traballan de xeito conxunto, segundo palabras de Manuel José Fernández Iglesias, un dos profesores que participa na investigación, “para acadar unha solución tecnolóxica o máis sinxela, o máis barata e o máis útil posible”.
O proxecto é unha das principais liñas de traballo dos grupos de investigación que forman parte de Acetic, a agrupación en Tecnoloxías da Información e as Comunicacións, unha das catro que seleccionou a Xunta de Galicia na Universidade de Vigo (só existen oito en toda a comunidade) dentro dunha convocatoria de axudas para consolidar as unidades de investigación máis competitivas e que dirixe a profesora, Nuria González Prelcic.
O traballo integra tarefas de desenvolvemento e innovación que se levan a cabo entre os diferentes grupos de investigación que forman parte do agrupamento, neste caso varios grupos dos departamentos de Enxeñaría Telemática e Teoría do Sinal e as Comunicacións. “Trátase de sumar o coñecemento e a experiencia que ten cada un dos grupos para desenvolver proxectos moito máis ambiciosos e con moitísimo máis impacto”, subliña Fernández Iglesias.

O obxectivo é empregar a televisión como “centro de servizos” para as persoas dependentes, é dicir, proporcionar acceso a servizos da funcionalidade e potencia dos servizos en liña, pero empregando unicamente un televisor e un mando a distancia, “un campo no que xa hai algunhas cousas feitas, pero onde queda moito por desenvolver”, subliña Juan Santos, outro dos investigadores implicados no proxecto.
Desde a escola destacan este aspecto porque os ordenadores, malia que cada vez son máis amigables para determinados perfís da poboación, non son a mellor ferramenta para chegar a este colectivo, que atopa na televisión o que outros atopamos nos ordenadores; é dicir, a súa fonte de entretemento.
Outro dos criterios básicos da parte técnica para levar este proxecto aos televisores é que os aparellos teñan un custo moi reducido para lograr que efectivamente sexa factible o seu desenvolvemento
Todo o desenvolvemento do proxecto estase a realizar tendo en conta e traballando man a man cos principais destinatarios dos servizos, polo que, segundo informan dende a Universidade, “son habituais as reunións de traballo con asociacións como a Cruz Vermella, a Confederación Galega de Persoas con Discapacidade, Cogami; a Asociación Galega contra as Enfermidades Neuromusculares, Asem Galicia; a Asociación Galega de Xerontoloxía no Traballo Social, Axetra; a Asociación de Familiares de Enfermos de Alzheimer ou a Asociación de Enfermos de Párkinson de Vigo”.