A Estrada empregará Bluetooth para informar aos turistas dos seus puntos de interese

O Concello da Estrada, un dos máis que máis quilómetros cadrados da nosa terra abrangue, vén de dar a coñecer que botará das máis innovadoras tecnoloxías para evitar que as persoas que o visiten (e tamén os que alí residan) marchen sen ter ocasión de ver o máis salientable dende o punto de vista paisaxístico, etnográfico ou cultural. Segundo se conta en El Correo Gallego, as canles das que se botará man non son outras que as que os móbiles e a Rede en combinación co Bluetooth poñan en xogo. A iniciativa, que vén da man do Concello e está incluída no Plan E, ten un orzamento de algo máis de 30.000 euros. Tecnoloxicamente falando consiste na posta en marcha dunha plataforma turística multimedia que mellore os servizos aos visitantes.
A ferramenta, que poderá ser consultada dende o móbil, subministrará información sobre os emprazamentos da Estrada que todo turista non pode deixar de coñecer, engadíndose a cada un deses puntos as coordenadas e a localización exacta. A información achegada completarase con datos sobre as máis importantes celebracións e os servizos hostaleiros que os usuarios teñen ao seu alcance. A ferramenta disporá de tres terminais para botar man destes contidos a través de Bluetooth, terminais que estarán emprazados na praza do Concello, en A Farola e na oficina de turismo. Tamén se poderá facer uso da páxina municipal co mesmo fin.