Choiva de premios tecnolóxicos no Centro Multimedia de Galicia

Maña, enxeño, maxín, creatividade… e sobre todo, moita, moita paciencia é o que se precisa para facer unha creación audiovisual semellante á que fixeron os e as alumnas do IES Leiras Pulpeiro de Lugo para gañar o concurso de stop-motion que a Secretaría Xeral de Medios convocou para celebrar os primeiros 25 anos de vida da CRTVG.
A aula audiovisual do Centro Multimedia de Galicia (CMG) vén precisamente de dar acollida á entrega de premios aos gañadores dos distintos eventos convocados na Rede para a ocasión, e a ela non faltaron nin o secretario xeral de Medios, Alfonso Cabaleiro, nin o director xeral da CRTVG, Alfonso Sánchez Izquierdo, que presenciaron con entusiasmo a visualización do proxecto gañador.
Os rapaces e rapazas que convenceron ao xurado do premio á mellor animación con plastilina, recibiron a prometida videocámara dixital con moita ilusión, polo que é de agardar que a partir de agora nos sorprendan novamente con pezas tan divertidas como a que nos brindaron para o concurso, malia que algúns afirmaban que “pese a ser moi divertido traballar coa técnica do stop-motion, dá moito choio” e non lles gustaría dedicarse a isto no futuro.
Porén, tanto o secretario xeral de Medios como o director xeral da CRTVG animáronos a seguir con este labor e a levar o audiovisual galego ao máis alto, sempre apostando pola nosa lingua como o leva facendo a CRTVG ao longo destes 25 anos.
No acto tamén se aproveitou para entregarlles os merecidos galardóns aos gañadores dos outros dous concursos convocados para o aniversario do noso ente comunicativo máis importante: o Que está a pasar nas aulas da Rede CeMIT e As grandes frases da dobraxe da Galega, dos que saíron vencedores Alfredo Brambila Galindo e Felipe Crespo Lombardía, respectivamente, que obtiveron cadansúas videocámaras dixitais.
A maiores, no primeiro certame houbo outros dous premiados: Marcos González Bermúdez, que levou un reprodutor blu-ray, e Álvaro Lorenzo Rey, quen recibiu un disco duro externo de 500 Xigabytes e 2,5”.
Por outra banda, no concurso As grandes frases da dobraxe da Galega, na que resultou elixida a emblemática “vai rañala, raparigo, de Terminator”, tamén se concederon cadansúas mencións á promoción viral a aquelas persoas que máis empregaron as etiquetas propostas, resultando gañadores Alfredo Brambila e María Pilar Fernández Iglesias, que foron agasallados cun reprodutor blu-ray e un disco duro externo cada un.
Durante o acto, o secretario xeral de Medios, Alfonso Cabaleiro, lembrou que este proxecto de colaboración entre o seu departamento e a CRTVG, “nacía co obxectivo común de potenciar os avances tecnolóxicos cos que conta o noso país no ámbito das comunicacións”, así como de “facer partícipe desta celebración a toda a cidadanía”.
Neste senso, Cabaleiro salientou o gran éxito de participación de toda a poboación nas devanditas actividades, ás que se achegaron máis de dúas mil persoas procedentes de toda Galicia, así como a afluencia de visitas á web do evento, que andou polas 2.000 visitas ao mes.
Pola súa banda, o director xeral da CRTVG, Alfonso Sánchez Izquierdo, que recibiu un recoñecemento da man do secretario xeral (un agasallo que por certo estaba fora do programa e sorprendeu a tódalas persoas asistentes), aproveitou a ocasión para agradecerlle á Secretaría Xeral de Medios a súa colaboración así como “as numerosas facilidades ofrecidas para poder compartir coa cidadanía galega, dun xeito próximo, este simbólico aniversario”.