Vigo dá acubillo estes días a unhas xornadas sobre TIC para persoas con diversidade funcional

A Escola de Enxeñaría de Telecomunicación da Universidade de Vigo acolle dende onte uns encontros dirixidos a poñer de relevo o alto potencial da innovación dixital na mellora da calidade de vida das persoas dependentes ou con diversidade funcional. Máis polo miúdo, trátase das Xornadas de e-Accesibilidade: Promovendo a autonomía persoal, uns encontros que, como o seu propio nome indica, serven para ir das ideas aos feitos en materia de tecnoloxía solidaria. Entre os exemplos deste eido da I+D que se están a tratar nestas xornadas inclúense achegas concretas como un dicionario de signos para o móbil, un prospecto de medicamento accesible ás persoas cegas ou un teléfono de emerxencias ao que poidan acceder os xordos.
As xuntanzas, inauguradas por Manuel Fernández Iglesias no seu primeiro acto oficial como vicerreitor, responde segundo fai saber a Universidade aocompromiso renovado de atender ás demandas da sociedade en materia de inclusión e autonomía persoal.
No evento están a participar persoeiros das TIC sociais como Santiago Moreno, director da Fundación Vodafone España, coorganizadora do encontro, quen fixo fincapé nas sólidas fitas de colaboración que unen a entidade coa Escola de Enxeñaría, sendo a investigación na axuda a persoas con diversidade funcional un dos grandes puntos en común. Na súa opinión, téñense dado pasos importantes neste eido, aínda que tamén é certo que fica moito por facer: “A día de hoxe, temos unha tecnoloxía moi poderosa, prezos reducidos e oportunidades para desenvolver moitas cousas para facilitar a vida destas persoas”.
Xunto a Fernández Iglesias e Santiago Moreno, participaron na apertura das xornadas a directora da escola, Edita de Lorenzo, e o subdirector xeral de Desenvolvemento da Sociedade da Información da Xunta, Cristobal Varela que, entre outras accións que está a levar a cabo o Goberno galego, salientou o Plan Integral de Atención ás persoas con discapacidade “que será presentado en vindeiras semanas”.
Hoxe martes, informa a Universidade de Vigo, o eixe central será precisamente o eido universitario, primeiro coa participación de investigadores de diferentes grupos de investigación da escola,que exporán os traballos que se están a levar a cabo neste eido (axuda a dependentes no fogar, radiolocalización para maiores e contornas de teleasistencia) e, logo, unha mesa redonda sobre Universidade e Accesibilidade. Posteriormente clausurarán o encontro, o reitor, Salustiano Mato; a conselleira de Traballo e Benestar da Xunta de Galicia, Beatriz Mato; a concelleira de Benestar Social, María Méndez e o director Territorial Noroeste de Vodafone, Juan José De Santiago.