Igalia achégalle as vantaxes do software libre ó entorno empresarial

O persoal responsable do Máster en Software Libre de Igalia, que recentemente ampliou o prazo ordinario de inscrición ata o vindeiro venres 1 de outubro, vén de anunciar a súa intención de organizar unhas sesións de debate nas que falar sobre software libre no ámbito profesional, destacando casos de éxito de empresas con produtos baseados en tecnoloxías abertas e as principais asociacións galegas e estatais dedicadas á promoción e apoio a este tipo de ferramentas.
As xornadas, que terán lugar nas fins de semanas de setembro, comprenden a celebración de mesas redondas nas que os alumnos do máster e outras persoas interesadas poidan coñecer as saídas laborais e oportunidades de negocio que hai do redor do software libre, tanto no ámbito local como internacional; así como a presentación de proxectos de software libre por parte de empresas de Agasol e seminarios técnicos impartidos por profesores do máster.
O programa, entre outras cousas, inclúe un seminario sobre enxeñaría lingüística e software libre e outro sobre os conceptos básicos de búsqueda na Rede con Lucene e Nutch, impartidos por profesionais do sector.
A entrada é de balde porén requírese a inscrición previa das persoas participantes para controlar o aforo. Posto que as prazas están limitadas, a organización rexistrará as inscricións por “estrita orde de chegada”.
O formulario de inscrición atópase dispoñible na páxina oficial do evento.