O primeiro picosatélite galego comezará a funcionar o mes que vén

Jean-Jacques Dordain, director xeral da Axencia Espacial Europea (ESA) anunciou que o lanzamento inaugural do foguete Vega terá lugar o vindeiro 9 de febreiro (data suxeita a posibles modificacións, como acontece habitualmente neste tipo de iniciativas) polo que cada vez está máis preto que o XaTcobeo comece a súa carreira espacial, xa que este foguete será o que transportará 9 picosatélites CubeSat 1U entre os que estará o desenvolvido dende a Universidade de Vigo, o que supón un momento histórico para a comunidade científica galega.
O coñecido como XaTcobeo xa está integrado na cabeza da lanzadeira Vega dende o pasado mes de decembro, agardando ao seu lanzamento dende o Centro Espacial Europeo da Güiana francesa, para desenvolver logo 2 experimentos durante os máis de 3 meses que se agarda que o picosatélite estea en activo: unha radio-software reconfigurable en voo e a medición dos efectos da radiación dos aneis de Van Allen na electrónica embarcada.