O Windows Phone 7.5 posto a proba nun orixinal reto no CES

Aínda que tecnicamente os actuais terminais con Windows Phone non son superiores aos seus competidores, dende Microsoft queren insistir en que o deseño do seu software está mellor orientado a un uso real dos dispositivos móbiles, e para demostralo emprendeu un curioso reto durante o CES en Las Vegas, onde ofrecían 100 dólares a quen co seu móbil puidese facer certa tarefa dun xeito máis rápido que Ben The PC Guy Rudolph cun dos móbiles co sistema operativo de Microsoft que tiñan no expositor da compañía.
Esta carreira por ver quen tuiteaba antes unha foto tirada co móbil, quen localizaba máis rápido un restaurante, quen identificaba a maior velocidade unha canción que podía escoitarse nunha radio ou quen comprobaba con maior axilidade o estado do tempo non só foi un experimento divertido, senón que tamén serviu para demostrar que é posible optimizar moitos procesos nos dispositivos móbiles, quedando aínda moito camiño que avanzar, de aí que a competencia entre Android, iOS, Windows Phone e outros sistemas operativos sexa moi positiva para o usuario.
A primeira xornada na que levaron a cabo este orixinal reto saldouse con 21 vitorias por parte de Ben Rudolph, ao que só superaron en 2 ocasións, rematando tamén outra en empate.

Resumo da primeira xornada do reto