Jerry Yang cesa dos seus cargos en Yahoo!

Nos últimos anos parece que Yahoo! non consegue levantar cabeza, o que resulta evidente se vemos os cambios na dirección da empresa, que en setembro abandonou Carol Bartz, quen só conseguiu manter o seu cargo 32 de meses, e agora é o propio fundador da compañía, Jerry Yang, quen vén de renunciar ao seu posto no Consello de Dirección e todos os seus cargos en Yahoo! (e tamén en Alibaba Group Holding Limited).
Yang fundara Yahoo! Inc en 1995 con David Filo, ocupou o posto de director xeral entre xuño de 2007 e xaneiro de 2009 (período no que rexeitou unha oferta de compra de 47.500 millóns de dólares por parte de Microsoft, o que molestou a boa parte dos accionistas da compañía), e estaba considerado como un dos máximos responsables do rumbo errático da compañía, que en 1996 saíra a Bolsa e conseguira converterse nunha das empresas máis importantes do mundo para verse rapidamente eclipsada por Google e outras empresas de Internet, ata chegar a ser considerada como irrelevante para boa parte do público (agás polos servizos de correo electrónico e hospedaxe de imaxes da compañía).
Actualmente a dirección da compañía está nas mans de Scott Thomson, nomeamento co que Yang asegura estar entusiasmado segundo manifesta na súa carta de despedida ao Comité de Dirección de Yahoo!.