RIM rexistra perdas netas no último trimestre fiscal

Research In Motion (RIM) publicou os resultados do seu cuarto trimestre fiscal, deixando ver que nestes tres últimos meses tiveron uns ingresos de 4.200 millóns de dólares, o que supón un 19% menos que a súa previsión e un 25% menos que o mesmo trimestre do ano pasado; pero estes datos aínda son peores do que parecen, pois veñen acompañados dunha perda neta de 125 millóns de dólares, cando no trimestre anterior gañara 265 millóns e no mesmo trimestre de 2011 gañara 934 millóns de dólares.
Á vista destes resultados non sorprende que nas últimas horas soubésemos do cesamento no seu cargo de varios altos directivos da compañía canadense, como o co director xeral Jim Balsille, o director técnico de software David Yach e o xefe de operacións globais Jim Rowan, que poderían ser só os primeiros dunha importante purga na empresa para intentar un cambio de rumbo que corrixa a situación actual.
Dende RIM comentan que van re enfocar os seus esforzos nos seus puntos fortes, ou sexa, no clientes corporativos, aínda que iso non quere dicir que vaian abandonar o mercado de consumo como deron a entender algúns medios de comunicación nas últimas horas. Tamén confían que a chegada de BlackBerry 10 poidan ser o revulsivo que a compañía necesita, aínda que o retraso desta necesaria actualización da súa plataforma móbil podería facer chegar á empresa a un punto de non retorno.