A Mesa confía en termos o .gal antes de que remate 2013

A Mesa pola Normalización Lingüística vén de expresar a súa confianza en obtermos o dominio propio galego, o .gal, antes de que remate 2013. A plataforma fixo fincapé, ademais, no importante traballo que se está a desenvolver dende a Asociación Puntogal, que leva anos loitando pola consecución do devandito recoñecemento e que, tal e como sinalamos os días pasados, remitiu a candidatura co compromiso de máis de cen socios e máis de 12.000 apoios. A destinataria é a ICANN, a corporación internacional que xestiona os dominios da Rede.
Para A Mesa, unha das entidades promotoras da iniciativa, as vantaxes que xeraría o feito de termos a posibilidade de empregar o .gal serán moitas e variadas. “Todos os beneficios que xere no futuro o rexistro de dominios serán reinvestidos en iniciativas que promovan as novas tecnoloxías en galego, segundo figura no proxecto que avaliará a ICANN”, informa a plataforma que preside Carlos Callón. Segundo se nos recorda, o prazo para a estimación da nosa candidatura (que se suma a outras moitas procedentes dun bo número de recantos do mundo) é de arredor dun ano. De superar o exame e de entrar na primeira quenda de avaliación, o .gal podería estar xa activo e dispoñible a finais de 2013. “Este logro”, sinala a Mesa, “será posible grazas ao soporte dos máis de 100 socios de puntoGAL , do apoio dos máis de 12.600 internautas que asinaron en liña, das institucións que o secundaron e do traballo desinteresado da directiva”.