Twitter publica un barómetro sobre as eleccións estadounidenses

Os comicios electorais dos últimos anos están a ser moi diferentes na Internet, por atender cada vez a unha nova tendencia, e así como xa houbo campañas nas que a grande aposta foi Facebook, ou outras nas que o vídeo na Rede foi o rei, nos EE.UU. consideran agora que Twitter é o novo campo de batalla, o que levou á compañía detrás deste servizo a lanzar The Twitter Political Index, un espazo que mide as sensacións dos usuarios sobre os candidatos aos comicios norteamericanos (Barack H. Obama e Mitt Romney) a xeito de barómetro electoral.
Actualmente hai uns 2 millóns de tuits á semana que analizar, para o que Twitter conta co axuda do equipo de análise de datos Topsy e de 2 compañías de especializadas na elaboración de enquisas (The Mellman Group e North Star Opinion Research). Temos así unha análise que vai moito máis aló da suma de mencións ou de seguidores dos candidatos deste ano, senón que entraría no fondo dos contidos do que se comenta para poder ponderar a opinión pública.
En The Twitter Political Index podemos ver tanto a puntuación que ten cada un dos candidatos segundo o sistema desenvolvido para Twitter, como comprobar a súa evolución no tempo nunha gráfica.