AJE Vigo pon en marcha unha campaña para fomentar a innovación e o emprendemento na mocidade galega

AJE Vigo vén de pór en marcha unha campaña de apoio ás PEME galegas, sendo o seu lema e obxectivo o fomento da innovación entre a mocidade emprendedora. A campaña incluirá accións formativas e eventos de intercambio de coñecemento empresarial, dúas ferramentas básicas, sinala AJE Vigo, para afianzar os alicerces da innovación e a busca de novos mercados, a solución á crise do país, “a única solución posible”, engade a asociación. O primeiro evento da iniciativa desenvolverase o 4 de setembro, e será un obradoiro de emprendemento.
Segundo conta Patricia García, presidenta da entidade, os eventos que se programen levaranse a cabo entre os propios asociados galegos e outras comunidades de España. A campaña de AJE Vigo diríxese a sementar claves de recuperación produtiva nun intre “moi crítico para economía española que non se vai amañar só a través das solucións que veñan das administracións, a día hoxe desbordadas ante a situación”. E engade a asociación: “Os empresarios e emprendedores temos que entrar en acción, tamén, e concienciarnos sobre o que de verdade implica ter unha empresa, e prepararnos para afrontar un escenario no que é preciso redobrar esforzos persoais, xa que cada vez será máis difícil acceder a financiamento ou axudas públicas”.
Os eixes da campaña serán os seguintes: innovación, emprendemento e internacionalización.
A asociación informa que o calendario de actividades irase materializando de xeito progresivo, estando xa confirmado, iso si, o devandito obradoiro sobre como pór en marcha novas iniciativas de mercado para o vindeiro 4 de setembro.