Os clientes de Movistar poden pagar compras en Google Play coa factura do móbil

Telefónica Movistar presentou este venres 7 de setembro un novo servizo para pórlle as cousas máis doadas aos seus clientes de cara a faceren determinadas compras en liña. A medida materialízase a través do establecemento virtual de Android Google Play, pois a través deste servizo do buscador poderase pagar por aplicacións e contidos acubillados na devandita tenda directamente coa factura de Movistar. Para facermos isto, só teremos que seleccionar a opción Facturar á miña conta de Movistar.
A nova solución é froito dun acordo entre as dúas compañías para favorecer o acceso a aplicacións e contidos dixitais “do xeito máis cómodo e seguro”. Sobre as vantaxes do sistema, segundo apunta Telefónica son moitas e variadas, “tanto se adquirimos unha aplicación ou un xogo para teléfono móbil, como se realizamos compras dentro das propias aplicacións que se veñan descargando”. A facturación directa, engádese, permite aos clientes cargar o custe da compra á factura ou ao saldo prepago do móbil de xeito doado, sen que sexa preciso empregar tarxeta de crédito.