Discovery Max emite esta noite un documental sobre Steve Jobs

Esta semana é o primeiro cabodano do pasamento de Steve Jobs, icona da revolución tecnolóxica dos últimos anos, e para celebralo, esta noite a canle Discovery Channel vai emitir o documental Steve Jobs, el hombre que revolucionó el mundo ás 22:30 horas, completando a xornada coa emisión de Revolución iPod ás 23:30 horas.
A primeira reportaxe, emitida por primeira vez a 10 días do falecemento de Jobs baixo o título de iGenius: How Steve Jobs Changed the World, conta con Adam Savage e Jamie Heyman (Cazadores de Mitos) como presentadores de excepción, achegando numerosos testemuños sobre a figura do co fundador de Apple, entre os que hai figuras dos primeiros tempos de Apple, xornalistas e incluso integrantes do sector cultural, pois o impacto de Apple nos últimos anos sobre o mundo foi transversal, indo moito máis aló do sector TIC, especialmente tras o lanzamento do iPod, que desencadeou todo un fenómeno no que reprodutores multimedia portátiles, smartphones e tablets convertéronse en obxectos cotiáns. Precisamente por iso, Discovery Max optou por pechar a noite con Revolución iPod, reportaxe na que renden tributo ao reprodutor multimedia de Apple, que marcou unha xeración como no seu día fixeron o CD ou o Walkman.

Tamén sobre a persoa de Steve Jobs podemos comentar que para conmemorar o aniversario da súa marcha, o museo de cera de Madame Tussauds en Hong Kong estreou unha estatua de Jobs, que sorprende polo seu realismo, tanto na reprodución da súa cara como na súa vestimenta (uns vaqueiros Levi’s 501, zapatillas New Balance e a súa característica camiseta negra de manga longa con pescozo de tartaruga). A figura foi esculpida durante 3 meses, custou 1.500.000 dólares de Hong Kong (uns 150.000 euros) e incluso conta coa aprobación da familia de Jobs (en contraste coa figura que tiñan pensado comercializar dende InIcons, que foi cancelada a primeiros de ano).

Vídeo sobre a nova figura de cera de Steve Jobs publicado en M.I.C. Gadget