Apple e HTC pechan un acordo de patentes

A pasada fin de semana unha nova sorprendeu a boa parte do sector TIC global, pois Apple e HTC anunciaron un acordo mundial sobre patentes que enterraría a machada de guerra entre os 2 fabricantes durante 10 anos. Aínda que os detalles do acordo non se fixeron públicos, coméntase que HTC aceptaría pagar a Apple entre 6 e 8 dólares por cada móbil con Android vendido, o que podería sumar entre 180 e 280 millóns de dólares ao ano, pero de facermos memoria non debería sorprendernos (pois actualmente HTC xa paga 5 dólares por smartphone a Microsoft).
O acordo podería servir para que HTC marcase a diferenza fronte a outros fabricantes de móbiles con Android (empregando elementos dos que teñen que prescindir para non infrinxir as patentes de Apple) aínda que tamén podería servir para que outras compañías pechasen acordos semellantes nos vindeiros meses.