R supera as 200.000 liñas de móbil na nosa terra

O operador galego R segue a medrar a bo paso no que a clientes de servizos móbiles se refire. Así nolo lembra, precisamente, este mes de novembro coa publicación dun informe que fai reconto do acadado os días pasados e, por extensión, ao longo do ano en liñas, usuarios, empresas adheridas, etc. Para comezar, a compañía conseguiu este mes de novembro deixar atrás a liña das 200.000 liñas de móbil, con 155.500 de clientes particulares e unhas 44.500 de empresas. Entre outras cousas, isto significa que se duplica a cifra de xuño do ano pasado e que se acumulan, en 2012, máis de 80.000 liñas netas.
A compañía galega afiánzase desta maneira como a que máis medra na nosa terra en cuestións de telefonía móbil. Polo que se refire ao papel que está a xogar a nivel español, R é a sexta operadora que máis clientes está a acadar, información que, segundo fontes da firma galega, aínda amosa máis relevancia se temos en conta que a totalidade do mercado de R está centrado na súa Comunidade.

Pero hai máis. O pasado mes de outubro, R bateu unha nova marca, xa que foi o mes no que máis
liñas portaron o seu número dende outras compañías ao operador galego. “Nun só mes”, informa a compañía, “R fíxose con 11.124 portabilidades, datos que contrastan coa coa tónica rexistrada no mercado estatal da telefonía móbil no que, segundo datos da CMT, a Comisión do Mercado das Telecomunicacións, este sector perdeu en total en setembro 242.241 liñas, tal e como se pode ver nas redes”.
Para a empresa galega, as boas cifras logradas ao longo deste ano teñen unha serie de razóns ben concretas. Ou sexa, son perfectamente localizables. Para comezar, cómpre remitirnos á mellora do prezo definitivo das súas ofertas combinadas de fixo e móbil, con descontos de ata 15 euros ao mes para sempre. Tamén se achegan rebaixas de ata a metade do seu custe nas tarifas de móbiles de R, aplicadas logo do verán de maneira automática nos seus clientes.

A operadora galega, ademais, “ten vantaxe na tendencia actual dos grandes operadores de empaquetar produtos, pois integra xa dende o seu nacemento, aló polo ano 2000, todos os seus servizos en paquetes ou combos e nunha única factura, coa finalidade de acadar os máximos descontos para os seus clientes”. Asemade, é xa unha tónica en R, dende as súas orixes, atender aos seus clientes dende a nosa terra, con xente de aquí e falando en galego ou en castelán, segundo se requira, estratexia que se desenvolve tamén a través das súas 70 tendas e distribuidores espallados pola xeografía galega e os máis de mil profesionais que traballan no proxecto.
“Nunha contorna xeral de crise”, explica R acerca das devanditas cifras e métodos de traballo, “toma máis valor aínda este obxectivo de dotar ás empresas e ás persoas que viven en Galicia dos mellores avances e servizos de telecomunicacións”. O investimento de R na súa Comunidade vai alén, xa, dos 880 millóns de euros no despregamento dunha nova rede de fibra óptica que está a disposición de 870.000 fogares e empresas galegas en máis de 80 concellos galegos.