Os servizos web e as aplicacións móbiles centran a nova xeira Betabeers, no CNTG de Santiago

O Centro de Novas Tecnoloxías de Galicia, CNTG, emprazado en Santiago, acollerá o vindeiro día 14 de decembro unha nova xeira de traballo das xuntanzas Betabeers, organizada pola representación galega deste novo xeito-metodoloxía de entender e presentar as reunións de profesionais das novas tecnoloxías: presentacións máis directas, obradoiros activos, coworking e un clima de amizade e intercambio fluído de coñecemento. A cita dará comezo ás 18.30 horas, e está especialmente dirixida a desenvolvedores de servizos web e aplicacións móbiles.
As reunións de Betabeers teñen por obxectivo relacionar a persoas técnicas con espírito emprendedor, programadores, deseñadores, investidores e asesores a través de coworking e amosar as últimas tecnoloxías ou innovacións no desenvolvemento a través de obradoiros curtos. Búscase con elas, sobre todo, cubrir catro áreas principais de interese: encontro de desenvolvedores web e apps, charlas de desenvolvemento, presentacións de startups e networking. As reunións son de balde, xeralmente en horario de tarde e dando acubillo a arredor de 35 persoas. “Nelas lévase a cabo a presentación de proxectos para demostrar que non só en Silicon Valley se poden xerar negocios interesantes”, informa o equipo galego de Betabeers.