La Bruixa d´Or avisaranos no móbil dos décimos de Lotería que saian premiados

As cousas do Nadal ensaríllanse cada vez máis coas redes. Mesmo os seus sorteos. Sen ir máis lonxe, este 22 de decembro unha das administracións de Lotería de máis renome a nivel estatal, La Bruixa d´Or, váisenos meter no móbil para cantar os décimos premiados. Sempre que queiramos escoitalos, claro. Isto vai ser posible grazas a unha aplicación que, ademais do devandito, serve para mercar e gardar tódolos décimos de Lotería de Nadal no noso trebello. Trátase dunha ferramenta de balde, dispoñible en App Store e achegando tres opcións diferentes para mercar décimos: elixindo a terminación, considerando os números bonitos ou ao chou.
Ademais de mercar lotería, esta aplicación permite tamén administrar os décimos adquiridos tanto a través do móbil como en calquera outro lugar (para introducir un décimo de papel comprado nunha administración, o usuario só ten que escanear o código de barras ou engadir o número de xeito manual).
Como dixemos, a aplicación avisará de maneira instantánea, durante a celebración do Sorteo de Nadal, se algún dos décimos foi premiado. Segundo engaden dende a Bruixa, “é a primeira vez que isto acontece: asistir en directo a este famoso sorteo a través dun teléfono móbil”.