Coremain amosou a súa experiencia en e-saúde no congreso asturiano sobre o sector

A empresa galega Coremain foi unha das participantes no Primeiro Encontro Empresa Saúde, InnoSalud, organizado pola Dirección Xeral de Innovación Sanitaria do Goberno de Asturias. No transcurso desta xornada, na que estiveron presentes máis de trinta organizacións, o director xeral da compañía con sede Polígono de Costa Vella de Santiago, Luís Álvarez Sestelo, salientou a importancia de afinar a puntería con respecto aos investimentos que se fagan no sector sanitario e as novas tecnoloxías, encamiñándoos cara o que se coñece como xeración de valor, o que, entre outras cousas, implicaría unha verdadeira rendibilidade futura (vantaxes e beneficios para cidadáns, institucións e empresas) e unha factible transferencia de coñecemento e experiencia cara a outros ámbitos, entidades ou sectores.
Animou tamén ás administracións a apostar polas liñas estratéxicas nas que son fortes, polo vieiro da especialización intelixente, en liña coas medidas europeas e tratando en todo intre de evitar a dispersión de fondos. Centrándose na actividade de Coremain, destacou os máis de 20 anos de traxectoria empresarial da compañía e “o elevado nivel de coñecemento que posúe do sector sanitario, para o que desenvolveron máis de 300 grandes proxectos”. Con esta iniciativa, informa Coremain, o Executivo veciño, ademais de promover a capacidade investigadora e innovadora da sanidade pública como motor de crecemento e desenvolvemento económico, pretendeu crear vínculos de colaboración entre as empresas e a propia administración. O acto foi presentado polo conselleiro de Sanidade do Goberno de Asturias, Faustino Branco e contou tamén coa asistencia do director xeral de Innovación Sanitaria, Enrique González, ademais de representantes doutras entidades relacionadas coa innovación, as novas tecnoloxías e a investigación.