Desenvolven unha nova aplicación para interactuar dende o móbil coas pantallas comerciais iwall

A empresa Iwall in Shop vén de crear unha aplicación de realidade aumentada para teléfonos intelixentes que permite aos usuarios interactuar coas marcas que máis lles interesen. Este desenvolvemento, que xa comezou a empregarse nas máis de 600 pantallas interactivas (iwall) que xa están dispoñibles en España (centros comerciais como o Espacio Coruña na cidade galega, onde por certo xa se lle está a tirar partido), é un servizo de balde para smartphones e tablets e coñécese co nome de App Shapp. O seu potencial, sinala a empresa responsable, é amplo para os devanditos mupis interactivos, pero tamén para calquera soporte publicitario.
En palabras da empresa Iwall in Shop, a aplicación suporá “un revulsivo para o concepto de mercadotecnia e publicidade nun intre fundamental, non só pola crise económica que fai explorar novos camiños, senón polo avance de vangarda e tecnolóxico que supón”.
O obxectivo non é outro que chamar a atención do usuario, futuro comprador, e facer que recunque e que, polo tanto, manteña no tempo o seu contacto con este desenvolvemento. Asemade, búscase mellorar a experiencia de compra no punto de venda. En virtude desta aplicación, os usuarios poderán empregar a fondo os iwall espallados por toda a España, pero tamén os anuncios e etiquetas dos produtos que lles interesen, co fin de descubrir xogos, sorteos, promocións e ofertas en tempo real. “É o caso da campaña de Kinder Joy”, informa a empresa, “coa que se comezou a utilizar esta aplicación e que permite xogar e participar nun sorteo se se enfoca directamente ao seu produto, o ovo Kinder Joy”.
Para entrar neste xogo virtual, hai que descargarse a aplicación gratuíta, buscar unha imaxe en promoción, apuntar e escanear. “A partir dese momento o coche, o perfume, a sesión de fotos ou a pasarela que se anuncia cobra vida, convertendo o centro comercial nun espazo doutra dimensión onde o usuario é protagonista”, engade a compañía, que avanza que “facer shapp fronte a un iwall ou nas etiquetas dun produto suporá unha viaxe cara a novas propostas que se poderá compartir nas redes sociais, vía mail ou capturando a pantalla”.