Comeza na Coruña a edición XII de Mundos Dixitais

Dende hoxe ata o sábado 6 de xullo, a sede da Fundación Novacaixagalicia da Coruña vai dar acollida á edición número doce do festival Mundos Dixitais, un evento que, como seu propio nome indica, diríxese a amosar os resultados da exploración dos novos creadores do audiovisual e das novas tecnoloxías polos territorios aínda por descubrir das moi diversas dimensións virtuais. Este ano, a organización concederá un premio especial a Félix Bergés, responsable dos efectos especiais da película O Imposible, de Juan Antonio Bayona, onde se relata a loita pola supervivencia dunha familia durante o tsunami de Tailandia, en 2004.
Segundo fixo saber aos medios Manuel Meijide, director do festival galego, os motivos para ter tomado a decisión de recoñecer o labor de Bergés son moitos e variados, pero por enriba de todo salienta o feito de ser “un dos profesionais máis relevantes a nivel internacional no eido dos efectos especiais”. Meijide tamén fixo fincapé na presenza no certame de Carlos Grangel, co-responsable do labor técnico e creativo de grandes filmes como A noiva cadáver, de Tim Burton, e que o sábado 6, ás 11.00 horas, avaliará os detalles das películas Pirates e Hotel Transilvania. Asemade, destacou a participación estes días dos profesionais David Caeiro e Anna Sitja, que traballaron en O Hobbitt de Peter Jackson e que falarán da súa experiencia o sábado ás 12.30 horas.