Yoigo quere levar a súa rede 4G a máis de cen cidades españolas antes de que remate o ano

Esta semana o operador Yoigo subiu un novo chanzo na súa carreira cara os servizos globais de rede 4G. Máis polo miúdo, comezou a operar coa devandita tecnoloxía na Comunidade de Madrid e anunciou a ampliación do despregamento de rede 4G de seu para este ano 2013, un proceso que afectará a boa parte do territorio estatal. Concretamente, a máis de 100 cidades, ou, o que é o mesmo, practicamente a metade da poboación española. Segundo informa o operador, o servizo que lles ofrece aos usuarios, “o máis completo de España en materia de presenza e espallamento”, non terá custo adicional. Como dixemos, o 4G de Yoigo cubrirá máis de 100 cidades de 43 provincias diferentes: todas as cidades españolas de máis de 100.000 habitantes (63) e todas as de máis de 70.000 (50).
Lembrar que a compañía está a despregar a súa rede 4G na banda de 1.800 MHz, a banda que se está convertendo no estándar de roaming internacional en 4G, e que permite velocidades de baixada dun máximo de 75 Mbps, cunha media de entre 20 e 40 Mbps. No caso de que Yoigo destine os 15 MHz dos que dispón na frecuencia de 1.800 MHz a 4G, a velocidade máxima de baixada podería chegar a 112 Mbps, informa a empresa.
Para quen non coñeza as características desta tecnoloxía, dicirlle que 4G son as siglas utilizadas para referirse á cuarta xeración de tecnoloxías de telefonía móbil: é a sucesora das tecnoloxías 2G e 3G, e que precede a próxima xeración, a 5G. Este recurso está baseado completamente no protocolo IP, sendo un sistema de sistemas que se acada grazas á converxencia entre as redes de cables e as sen fíos. Esta tecnoloxía pode ser usada por módems Wi-Fi, móbiles intelixentes e outros dispositivos móbiles. A principal diferenza coas xeracións predecesoras é a capacidade para prover velocidades de acceso maiores de 100 Mbps en movemento e 1 Xbps en repouso, mantendo unha calidade de servizo (QoS) de punta a punta de alta seguridade.