Os portos deportivos galegos contarán con paneis sobre produtos e servizos náuticos da nosa terra

Sanxenxo e Portonovo, dúas das vilas galegas máis ligadas ás actividades de lecer no mar, foron o escenario elixido para presentar, esta semana, unha aplicación específica para a promoción do turismo náutico. A ferramenta e o seu desenvolvemento insírese nun acordo asinado no Club Náutico de Portonovo entre Turismo de Galicia e a Asociación Galega de Estacións Náuticas co obxectivo de impulsar o noso potencial para atraer visitantes a través das posibilidades da nosa costa en materia de lecer deportivo. A aplicación, informaron ambas entidades, será visible e accesible en tótems informativos a pé de porto.
Trátase, máis polo miúdo, “dun recurso pioneiro a nivel estatal que inclúe paneis con toda a información precisa sobre as instalacións portuarias e os lugares de interese turístico da zona, tanto dos recursos coma da oferta e de servizos existentes”. Ademais, engadiron, ofrecerá a posibilidade de coñecer a dispoñibilidade en outros portos asociados e de realizar reservas en calquera dos portos da rede.
Segundo explicou a directora de Turismo, Nava Castro, “o carácter innovador e pioneiro desta ferramenta contribuirá a difundir a gran potencialidade do turismo náutico en Galicia, unha comunidade que posúe as condicións idóneas para converterse no destino de referencia a nivel internacional neste tipo de actividades e entre todos temos que ser quen de potenciar aquilo que nos fai especial e nos diferenza doutros territorios turísticos”.