Vodafone dará soporte a un programa de atención farmacéutica para persoas de idade

A pasada semana a operadora Vodafone, dende a súa división española, confirmou a súa implicación no desenvolvemento tecnolóxico do Programa Adhírete, posto en marcha para favorecer a calidade de vida das persoas maiores con doenzas crónicas e polimedicadas. O cometido de Vodafone será o de achegar unha aplicación para teléfono móbil que permitirá a comunicación do paciente co seu farmacéutico na mellora da adherencia. A participación tecnolóxica da compañía de telecomunicacións nesta iniciativa formalizouse a través da sinatura dun acordo que contou coa presenza da presidenta do Consello Xeral de Colexios Oficiais de Farmacéuticos, Carmen Peña, e o director xeral da Fundación Vodafone España, Santiago Moreno.
Segundo informaron, a devandita aplicación permitirá alertar ao paciente ou coidador do incumprimento na toma da súa medicación e rexistrar se se efectuou. Ademais, os farmacéuticos contarán cun portal web que lles dará a posibilidade de xestionar a medicación dos pacientes incluídos no programa, notificacións ou recordatorio. O programa desenvolverase en 60 dispensarios de Badaxoz, Barcelona, Cáceres e Bizkaia, e permitirá “pór en valor os servizos asistenciais da Farmacia Comunitaria, conseguindo unha maior seguridade e efectividade da medicación, aumentando a calidade de vida do paciente e mellorando a sustentabilidade do Sistema de Saúde”, informa a operadora, que engade que está previsto para outono que se poña en marcha un estudo con 224 doentes que avaliará o impacto do programa en termos de custe-beneficio e de saúde.
As farmacias participantes na iniciativa desenvolverán un conxunto de servizos asistenciais e empregarán ferramentas de reforzo á adherencia (novas tecnoloxías e sistemas personalizados de dosificación). O programa está impulsado polo Consello Xeral e os Colexios Oficiais de Farmacéuticos de Badaxoz, Barcelona, Cáceres e Bizkaia, xunto coa Agrupación Farmacéutica Europea. Para o seu desenvolvemento conta coa colaboración de Esteve e cos apoios ao programa de Fundación Vodafone España e Anota.