Os empregados de Arteixo Telecom piden o mantemento dos seus postos de traballo e da propia empresa

Arteixo Telecom, ata hai pouco unha das empresas do noso sector TIC máis punteiras e que máis apostaban polo coñecemento xerado dende a nosa terra, non está a pasar nin moito menos polo seu mellor intre. A compañía, fundada en 1996 e nos seus tempos de meirande crecemento dando acubillo a 200 traballadores, foi obxecto recente dunha regulación laboral que, en palabras da propia empresa, foi debida a unha caída importante nas súas cifras de negocio e a unhas perdas previstas para este ano en curso de preto de medio millón de euros. Consecuencia: a firma acordou despedir a 46 traballadores (o 40% do equipo humano) e aplicar un plan de viabilidade con reducións salariais do 20%. Segundo puidemos saber, o proceso de reestruturación está a xerar importantes desencontros.
De feito, o Comité de Empresa denunciou xa que a dirección de Arteixo Telecom non permitiu o acceso dos empregados ás instalacións da firma nas Pontes, logo do remate das vacacións de agosto. O feito rematou cunha concentración dos traballadores ás portas da sede empresarial. Lembrar que a firma foi declarada en maio en concurso de acredores. Logo foi achegado o expediente de regulación de emprego temporal.
O acontecido este luns logo da parada vacacional, ás portas das instalacións das Pontes, súmase ás xornadas de mobilización dos traballadores da planta, que se concentraron o pasado xoves diante do edificio da Xunta na Coruña, no transcurso dunha reunión dos representantes sindicais coa delegada provincial Belén do Campo. Entre outras cousas, esíxese a materialización “dun plan de viabilidade real”, no que se manteñan os postos de traballo, e o compromiso da Xunta ante o risco de peche da empresa.