O Clúster TIC amplía persoal e anuncia visitas a tódolos seus membros

Tal e como vimos avanzando ao longo destes meses, cousa confirmada na máis recente asemblea, o Clúster TIC Galicia ten novo rumbo, novas metodoloxías de traballo e un espírito renovado de integración e diálogo no camiño do obxectivo común de todo o noso tecido empresarial TIC: medrar en tódolos sentidos e ámbitos. Logo da reincorporación de EGANET e as súas empresas, co fortalecemento que isto implica, o Clúster prepara agora unha ampliación firme das súas capacidades coa incorporación de novo persoal. A nova estrutura, informan fontes da alianza empresarial galega, está formada por Rosa Méndez na Xerencia; Adela Amado na Administración; Roberto Pérez en I+D+i; Óscar Santos en Proxectos e Mª Xosé Jamardo en Comunicación e Marketing.
A primeira tarefa a realizar pola nova estrutura, engádese “será a de coñecer polo miúdo as empresas socias, polo que os esforzos centraranse na realización de reunións con todas para recoller información de primeira man das empresas, dos seus produtos e servizos, das súas necesidades e das súas demandas”. Unha información que o Clúster cualifica de “fundamental” para elaborar accións e proxectos de interese para as empresas socias, potenciar o coñecemento e a colaboración entre empresas, ampliar os servizos para socio, dar forma ao catálogo de competencias TIC en Galicia e elaborar a axenda de internacionalización.