A cuarta edición de Navega con Rumbo dará acubillo a 220 actividades de divulgación e formación

O Colexio Profesional de Enxeñaría en Informática de Galicia (CPEIG) tivo tempo estes días, na lea dos preparativos para a súa cita anual de celebración (este venres en Santiago), para presentar a nova edición dunha actividade que, como o seu propio nome indica, encamíñase a facilitar ás novas xeracións os mellores xeitos de movérense na Rede. A iniciativa Navega con Rumbo, que tamén foi presentada pola Consellería de Cultura (entidade co-responsable da súa posta en marcha e desenvolvemento), chega á súa cuarta edición con obxectivos renovados e fortalecidos: guiar aos nosos pequenos e adolescentes cara a unha navegación segura, “tentando evitar que sexan vítimas de condutas como o ciberacoso”.

A iniciativa insírese no proxecto Abalar, contando con 220 actividades no seu seo. Segundo fixo saber Cultura, os especialistas do CPEIG serán os que se acheguen aos diferentes centros educativos para impartir charlas divulgativas dunha hora de duración, nas que lles ensinarán aos escolares a navegar por Internet “dun xeito útil e responsable previndo, ademais do ciberacoso, a dependencia das novas tecnoloxías”. Navega con Rumbo tamén se centrará nas recomendacións a profesores e pais e nais, “para que eles mesmos poidan chegar transmitir esas boas condutas aos rapaces e rapazas”.
O programa estará apoiado polas Guías de Boas Prácticas elaboradas polo CPEIG, dirixidas tanto ao alumnado coma ás familias e ao profesorado, que se poderán descargar en formato electrónico na web do programa, web na que tamén estará a disposición da comunidade educativa xogos e ligazóns de interese sobre a temática do programa. Como dixemos, trátase da cuarta edición da iniciativa tras a súa posta en marcha hai tres anos. Na primeira edición déronse 90 sesións informativas en centros educativos de Galicia, e no curso 2011/12 chegaron a preto de 140. No pasado curso a cifra elevouse a 200 e, nesta cuarta edición, pertencente ao ano académico 2013/2014 serán 220 accións e outros tantos centros educativos.