A rede TELGalicia lanza unha aplicación 2.0 chea de recursos tecnolóxicos para os nosos docentes

Os investigadores universitarios da rede TELGalicia veñen de desenvolver unha serie de recursos tecnolóxicos de utilidade para os nosos docentes. Estas achegas para profesores de Primeira e Secundaria están xa accesibles a través da aplicación Edu-AREA, unha ferramenta desenvolvida co obxectivo de facilitar o día a día dos mestres e, ademais, facer posible unha introdución integral das tecnoloxías 2.0 e 3.0 nese continuo fluxo de información e experiencias que son as clases nos colexios e institutos. Segundo informa a UVigo, os investigadores de TELGalicia levan dende febreiro traballando arreo nesta aplicación, sendo este mesmo (a recta final de outubro) o intre elixido para “presentala en sociedade” e botala a camiñar.
Así nolo conta tamén o profesor da Escola de Enxeñaría de Telecomunicación, Manuel Caeiro, coordinador dunha rede na que tamén participan investigadores dos campus de Ourense e Pontevedra, así como da Universidade de Santiago de Compostela e do CESGA. Segundo sinala Caeiro, un dos puntos fortes da ferramenta é sen dúbida a súa potencialidade interactiva. De feito, está aberta a que os docentes se apropien dos recursos que acubilla, “facéndoos seus e modificándoos para afacelos ás súas necesidades e intereses propios”. En base a isto, engade o investigador, o profesor adquiriría un papel moito máis activo na planificación da súas clases, pasando de ser transmisor de coñecementos prefabricados a ser un verdadeiro autor.
A ferramenta en cuestión foi dada a coñecer no marco da quinta Xornada TELGalicia, celebrada na Escola de EET. Segundo fixeron saber, entre as moitas propostas de actividades quen pon en xogo Edu-AREA (unha ferramenta na que teñen gran peso recursos como o GPS ou as redes e comunidades sociais tipo YouTube), figuran as seguintes: unha viaxe virtual polo sistema solar para espertar o interese dos máis pequenos polo mundo da astronomía; xogar ao clásico caza do tesouro en Internet para desenvolver competencias de procura de información na Web e mellorar as destrezas de lectura e comprensión de textos; ou conseguir calcular a superficie encerrada pola muralla de Viveiro empregando unha folla de cálculo e ferramentas cartográficas.