A cidadanía galega, na cabeza do Estado en materia de emprego da eAdministracion

Os datos recentes do Instituto Nacional de Estatística (INE) en materia tecnolóxico-dixital seguen guindando información de valor con referencia ao que acontece na nosa terra. Así nolo recordou os días pasados a Axencia para a Modernización Tecnolóxica de Galicia (AMTEGA), que fixo saber que os informes do INE sobre equipamento e uso das novas tecnoloxías da información nos fogares en 2013 “sitúan a Galicia no segundo posto do ranking de Comunidades Autónomas no emprego dos servizos da e-Administración durante os últimos doce meses”. Deste xeito, a nosa terra sobe un posto respecto ao ano anterior na interacción coas Administracións Públicas a través de Internet para obter información e descargar formularios, sendo só superada pola Comunidade de Madrid.
Segundo os datos do INE, un 61,5% dos internautas galegos obtivo información de páxinas web da Administración (5,5 puntos máis que a media estatal), un 43,1% descargou formularios oficiais (3,5 puntos máis que a media estatal) e un 33,6% enviou formularios cumprimentados a través de Internet (1,7 puntos máis que a media estatal).
Boa parte disto fíxose a través da sede electrónica posta en marcha ao abeiro do Plan de Modernización da Administración Autonómica, unha ferramenta para a xestión telemática de cidadáns e empresas e que tamén guinda unha serie de datos interesantes sobre o seu seguimento. Segundo informa AMTEGA, nos primeiros nove meses do ano presentáronse máis de 11.000 procedementos online a través da dita sede. Esta ten a día de hoxe dispoñibles preto de seiscentos procedementos e no que vai de ano recibiu máis de 200.000 visitas, “case o dobre das realizadas en todo o 2012”. Segundo engade a Axencia, o pasado mes de setembro o número de presentacións electrónicas creceu medrou de xeito significativo respecto ao mesmo período do ano anterior, pasando de 143 a 3.074.