A galega Edisa adapta o seu software Libra á normativa europea SEPA

Edisa informou os días pasados que a súa plataforma de xestión empresarial Libra xa está plenamente adaptada ás regulacións inseridas na SEPA (Pagos Unificados da Unión Europea), que entrará en vigor o vindeiro 1 de febreiro de 2014. Lembrar que SEPA é a iniciativa que permite que particulares, empresas e outros axentes económicos realicen os seus pagos en euros, tanto nacionais como internacionais, nas mesmas condicións básicas e cos mesmos dereitos e obrigas, con independencia do lugar en que se atopen. A zona SEPA está integrada polos 27 países membros da Unión Europea, así como por Islandia, Liechtenstein, Mónaco, Noruega e Suíza.
Polo tanto, informa Edisa, a partir do 1 de febreiro de 2014 todas as transferencias e domiciliacións que se realicen en España e no resto da zona do euro “serán unicamente SEPA”.
O traballo de adaptación da contorna de xestión empresarial da empresa galega, presente como lembraremos en organizacións de todo o mundo, realizouse ao longo dos últimos meses, facéndose fincapé en facilitar aos usuarios a transición ao novo marco de regulación e en telos ao tanto das principais novidades do mesmo. Por exemplo: as contas bancarias pasan a identificarse mediante o código internacional IBAN (que se constrúe a partir do tradicional Código Conta Cliente, CCC, usado en España), mentres que as entidades bancarias identifícanse mediante o código internacional BIC. “Dado que tanto o IBAN como o BIC (código SWIFT) véñense empregando desde hai tempo para as transferencias internacionais, Libra xa permitía alimentar estes datos tanto no mestre de bancos como nos domicilios de pago, aínda que limitado a domicilios estranxeiros”, explica Edisa. Con todo, esta funcionalidade está a ampliarse para permitir alimentalos tamén en calquera conta nacional, “de xeito que xa se poida identificar tanto ao ordenante como ao beneficiario segundo normativa SEPA en calquera instrumento de pago”, engade a firma galega.
En definitiva, a partir de febreiro do 2014 os bancos poden empezar a requirir estes datos, e a partir de febreiro de 2016 o IBAN será o único código de conta bancaria requirido. “É recomendable por tanto empezar a usar estes códigos canto antes”, lembra Edisa.