A nosa lingua despunta no eido da lingüística computacional

Para as/os que levan anos loitando para que o galego teña Rede e teña futuro (e ter futuro pasa de xeito inevitable por estar na Rede), velaí van boas novas: a nosa lingua atópase entre os idiomas que teñen recursos computacionais máis fortes e, polo tanto, entre os idiomas de vangarda no eido da lingüística computacional. Así nolo conta a investigadora Eva Domínguez Noya, a través da súa tese de doutoramento Etiquetaxe e desambiguación automáticas en galego: o sistema XIADA. Segundo se desprende da información que reflicte a Universidade de Santiago (institución perante a que presentou a devandita tese), o galego conta cun recurso de aplicación de etiquetas, de tipo morfolóxico e estatístico, cuxa taxa de acerto está no 96%. Ademais, a nosa lingua dispón dun corpus etiquetado morfoloxicamente de case 600.000 unidades cun sistema de recuperación de información “flexible e cómodo”, sinala.
Informar o marco de fondo empregado por Eva Domínguez para o desenvolvemento da súa tese foi en parte o traballo despregado dende o Centro Ramón Piñeiro para a Investigación en Humanidades. No seo deste centro, o catedrático de Lingüística española da USC Guillermo Rojo dirixe un proxecto multidisciplinar cuxo obxectivo é facilitar a recuperación de información do Corpus de Referencia do Galego Actual (CORGA), ademais de por forma ortográfica, por etiqueta morfosintáctica e lema. Resultado dese proxecto é a ferramenta creada especificamente para o galego denominada Etiquetador/Lematizador do Galego Actual (XIADA). Este foi, como dixemos, o alicerce da investigación de Eva Domínguez, unha tese que explica e describe, dende unha óptica lingüística, as características dos recursos desenvolvidos para identificar as diferentes unidades léxicas simples presentes nun documento escrito en galego e caracterizalas morfosintacticamente, sen normativizar os textos nin prescindir da análise de elementos marxinais.
A tese, informa a Universidade de Santiago, estivo co-dirixida polo profesor do Departamento de Lingua Española da USC Guillermo Rojo e a profesora do Departamento de Filoloxía Galega M.ª Sol López Martínez. O traballo, que acadou a cualificación de sobresaínte cum laude, xulgouno un tribunal presidido pola catedrática de Filoloxía Galega Rosario Álvarez Blanco e composto ademais polos profesores Mª Paula Santalla del Río, da USC; Jorge Graña Gil, da Universidade da Coruña; María Taulé Delor, da Universidade de Barcelona; e María Inês Pedrosa da Silva Duarte, da de Lisboa.